Novas actividades e proxectos pedagóxicos evitan o peche do CEIP Arcediago e multiplican as matriculacións

• O segredo: traballos máis prácticos, proxectos sobre a natureza, as efemérides do ano e excursións á contorna que os rodea
• Os tres cursos de educación infantil están no mesmo espazo e en primaria xúntanse polos diferentes ciclos educativos

CEIP Arcediago, en Santiso, exemplo de colexio rural

Remata un curso no que os colexios rurais seguen a ser unha peza clave na educación galega polas características xeográficas de Galicia. Un exemplo, o colexio de educación infantil e primaria Arcediago, no Concello coruñés de Santiso.

O municipio ten pouco máis de 1.500 habitantes e nacen moi poucos nenos, polo que o centro tivo que reinventarse para sobrevivir.

Triplicáronse as matriculacións

Un colexio rural no que as matriculacións se triplicaron neste curso académico. O segredo: traballos máis prácticos, con proxectos sobre a natureza, as efemérides do ano e excursións ao ambiente que os rodea. O CEIP Arcediago ten 43 alumnos e vai en aumento.

O director, Alfonso Muñoz, detalla que catro rapaces chegaron doutro concello e un do mesmo Santiso.

Actividades prácticas para atraer alumnado

Agrupan as clases por paso académico, de forma que teñen tres aulas de 12 alumnos e unha de 7. Os tres cursos de educación infantil están no mesmo espazo e, en primaria, xúntanse polos diferentes ciclos educativos.

Un modo de educación diferente que naceu dunha reportaxe sobre o colexio de Seve Cagide para Radio Nacional de España.

A partir de aí, organizouse unha festa colexial de fin de curso que se converteu nun acto lúdico e reivindicativo da escola rural, no que estiveron presentes a cantautora Carme Penim e ata o conselleiro de Educación, Román Rodríguez.

"A agrupación posibilita que se compartan experiencias e intercambio entre alumnado e profesorado, posibilidade que permite manter o centro", sostén o conselleiro.

“A agrupación posibilita compartir experiencias e intercambio entre alumnado e profesorado e posibilita manter o centro“

Diego Pereiro, alumno de 6º, di que o pasan mellor estando xuntos. "É difícil para os profesores, porque non dá tempo dar todos os temas"

Carmen Penim foi a cabeza de cartel do festival, que pechou a histórica Banda de Música de Visantoña, da parroquia do mesmo concello, interpretando a banda sonora da Guerra das Galaxias.