O vento do Norte provoca a baixada da temperatura da auga do Atlántico, a máis fría da Península

• O fenómeno prodúcese no verán, sobre todo de Fisterra cara o Sur
• O vento e o anticiclón provocan unhas correntes que fan subir á superficie a auga do fondo

A auga máis fría do mar

A costa de Fisterra cara o sur ten unha forma recta que favorece o tránsito do vento do Norte,  que enfría as augas.

"No verán, que é cando nos bañamos, é cando notamos máis a temperatura do mar. E coincide coa situación típica de que haxa anticiclón e vento do norte que vai exactamente paralelo á costa", precisa María Souto, de Meteogalicia.

Fenómeno do afloramento

Prodúcese así o fenómeno do “afloramento”, retirada da capa superficial do mar provocando que suba a auga fría do fondo. Por iso, cando hai anticiclón ou vento do Norte, as augas baixan de temperatura.

Ao producirse o "afloramento", as Rías Baixas e Portugal teñen a auga máis fría da Península.

Auga máis quente

Se se busca un baño máis quente, a mellor zona é a Mariña de Lugo e o arco Ártabro, alí a temperatura ronda os 20 e 21 graos, fronte aos ata 14 graos das Rías Baixas.