A cociña das avoas chega ás aulas

• Os alumnos de cociña do centro Carlos Oroza de Pontevedra rescatan e actualizan as receitas máis tradicionais
• Os menús pódense degustar no comedor do centro, ao que acoden as propias avoas para dar a súa opinión

A cociña das avoas chega ás aulas

Receitas tradicionais das avoas cun toque de modernidade. É o proxecto no que traballan alumnos de cociña do centro Carlos Oroza de Pontevedra. Os menús, a dez euros poden degustarse no comedor do centro. E entre os comensais, están algunhas das autoras das receitas.

Cipriana, 85 anos, escribiu hai tempo do seu puño e letra a receita da súa popular empanada de bacallau. Hoxe probará por primeira vez a que elabora o seu neto Adrián xunto aos seus compañeiros de segundo de cociña.

Os domingos, empanada

Botan man das novas tecnoloxías para pedirlle consello. Vemos a Adrián Rodríguez preguntándolle por vídeo chamada o segredo: “Todos os domingos a miña avoa fai empanada. Case sempre fai esta de bacallau, e todos os primos, os netos, os fillos sempre a piden porque está moi boa”.

“As croquetas e a tortilla de patacas da miña avoa son cousas que eu, aínda que queira, non son capaz de replicar“

Boris Darriba e o seu grupo son fieis á receita de luras recheas de carne de Perucha, unha avoa da Estrada: “Temos un calamar super bo, unha carne de porco celta super boa, que é o que estamos utilizando para facer a receita, e iso, por suposto, nos dá un plus”.

“As croquetas da maña avoa e a tortilla de patacas da miña avoa", engade Boris, "son cousas que eu, aínda que queira, non son capaz de replicar. Xa só por ese tempo atrás ao que botas a mirada... É imposible coller ese punto”.

Tradición actualizada

Nerea Rodríguez, tamén alumna do centro Carlos Oroza, explica as variación que introducen nas receitas: “Trátase de darlle un xiro á cociña tradicional das avoas para levala ao restaurante. En principio, non cambiamos ningún ingrediente, pero si lle damos unha voltiña. Por exemplo, ligar as salsas ou..., os anacos de polo, que elas igual poñían o polo enteiro e nós so poñemos os zancos”.

Das filloas, o leite frito e outras sobremesas tradicionais ocúpanse os alumnos de pastelaría.

Moitos medraron entre as cazolas, os guisos, as salsas das súas outras mestras, as avoas. Delas aprenderon que co boa materia prima e, sobre todo, con tempo e agarimo, o éxito da receita está case asegurado.