A CE veta a pesca de fondo en 94 áreas de ecosistemas vulnerables en augas de España, Francia, Irlanda e Portugal

• Os armadores alertan das consecuencias económicas e sobre o emprego nas frotas de arrastre e palangre
• Argumentarán con estudos científicos que algunhas das artes prohibidas poden ser compatibles coa protección

A CE pecha 94 zonas á pesca de fondo para protexer ecosistemas vulnerables

Confírmase o peche de 94 zonas á pesca de fondo para protexer ecosistemas vulnerables. A Comisión Europea decidiu adoptar unha medida que o sector considera moi prexudicial. Tardará uns meses en facerse efectiva, tempo que os armadores aproveitarán para argumentar, como aseguran algúns expertos, que artes de fondo como o palangre, poden ser compatible coa protección de corais e esponxas.

Afecta ás artes de fondo

A Comisión Europea prohibirá todas as artes que tocan os fondos mariños en zonas dun corredor rico en pesca, nos cantís entre o Golfo de Cádiz e Irlanda. O obxectivo é protexer campos de esponxas e corais de augas frías.

Os armadores critican que non foran consultados nin convenientemente analizadas as consecuencias socioeconómicas da medida que consideran moi prexudiciais.

A recomendación era pechar só o arrastre

A prohibición afecta á boa parte dos barcos de bandeira española que faenan no Gran Sol, aos de litoral, aos pincheiros ou volanteiros. Segundo un dos expertos do ICES que participou no estudo sobre protección de augas atlánticas, a recomendación ía dirixida a vetar o arrastre, non outras artes.

“Non é descartable que certo nivel de esforzo con palangre poida ser compatible cun bo estado ambiental dos ecosistemas mariños“

José M. García Irusta é investigador do Instituto Español de Oceanografía: “Hai numerosas evidencias científicas que demostran que as artes de arrastre teñen un impacto negativo nos ecosistemas mariños vulnerables, pero o impacto de outras artes de fondo como pode ser o palangre non está tan claro. De feito, non é descartable que certo nivel de esforzo con palangre poida ser compatible cun bo estado ambiental dos ecosistemas mariños vulnerables”.

A Comisión dá dous meses de prazo a Reino Unido para que avalíe a proposta. Os armadores calculan que así o peche podería entrar en vigor o próximo ano e agardan que se revise anualmente como os TAC e as cotas.

Acotar las zonas prohibidas

Van aproveitar estes meses para presentar argumentos e negociar unha redución da superficie vedada. Iván López, presidente da Alianza Europea de Pesca de Fondo, insiste en restrinxir a protección ás áreas realmente sensibles: “Mantendo a protección estrita sobre os ecosistemas, pero non tanto as zonas ao redor dos mesmos, e iso podería diminuír o efecto. Tamén que alí onde se coñeza exactamente onde están os sistemas vulnerables non se utilice un sistema estatístico que amplíe as zonas de peche innecesariamente”.

“Non se utilice un sistema estatístico que amplíe as zonas de peche innecesariamente“

As frotas afectadas terán que desprazarse. O sector teme tensións e sobrepesca sobre outras áreas. Augura un aumento de prezos porque, co gasóleo polas nubes, perder zonas de pesca ben coñecidas polos capitáns supón aumentar o tempo de captura e polo tanto os custos de explotación.