En marcha a sesión de investidura de Alfonso Rueda, coa intervención de todos os grupos da Cámara. A primeira quenda foi a do voceiro socialista. Luis Álvarez di que estamos ante un discurso do PP
repetitivo, máis do mesmo, que pertence a un tempo pasado: sen norte, sen rumbo e sen programa.
A líder da oposición, Ana Pontón, reivindicou a riqueza de Galicia e o seu capital humano. Afirmou que un cambio é posible: avoga por unha sanidade e educación de calidade, sen recortes e por unha comunidade con emprego para os mozos.
O voceiro do PP, Pedro Puy, defendeu a lexitimidade de Alfonso Rueda como líder dos galegos. Rueda intervén arestora, nos primeiros minutos do discurso pediu á oposición que escoite con atención as súas propostas, que non se cingan ó NON. Será investido cos votos da maioría absoluta do PP. O sábado tomará posesión do cargo coma o sexto presidente da historia da Xunta de Galicia -o único sen eleccións previas-.
