Galicia en 2 minutos 26-04-2022

Nova operación conxunta da Policía e a Garda Civil contra o grupo que fabrica narcolanchas nas Rías Baixas, presuntamente encabezado polo veterano Javier Otero Magdalena, do Grove. Hai unhas vinte persoas detidas e rexistros en vivendas e naves de varias localidades. // Sarria vive hoxe unha xornada especial coa visita do rei Filipe, xusto cando se fai público o seu patrimonio e se aproba unha reforma do funcionamento da casa real para darlle maior transparencia. // O parlamento inicia a tramitación da nova lei de xestión da auga, que pretende frear as fugas nas redes de subministro que a Xunta estima agora en ata o 40 por cento. A oposición reclama máis axudas para que os concellos pequenos poidan adaptarse. // Sanidade estuda administrar unha cuarta dose da vacina da Covid aos maiores de 80 anos, ao constatar que a dose de reforzo perde eficacia a partir dos tres meses fronte á variante Ómicron. 26-04-22