Telexornal-Galicia 2 - 03/12/12

Toma posesión o novo Goberno da Xunta, elexido para dirixir Galicia os próximos catro anos. Un periodo no que, asegura o presidente Alberto Núñez Feijóo, os axustes darán paso ao crecemento económico. Só se estrea o titular de Economía e Industria, Francisco Conde. // Comeza en Vigo unha folga indefinida no transporte urbano que reduce ao corenta por cento os autobuses que circulan nas horas punta e suprime once liñas. O paro dos traballadores da empresa concesionaria, Vitrasa, é unha protesta polo atranco nas negociacións do convenio, que tentan desbloquear coa axuda dun mediador. // Varias asociacións de persoas con discapacidade e os seus familiares denuncian en Vigo as dificultades que atravesan para facer o seu traballo. Pídenlle aos gobernos que respecten os dereitos adquiridos nos últimos anos para que a crise non complique aínda máis a integración. 03/12/12